24
Bryndís skrifaði góða umfjöllun um Valsleikinn sem fram fór í Höllinni í gær.
Þetta var leikur sem við höfðum í hendi okkar en töpuðum. Léleg vítanýting, tuð í dómurum og skortur á yfirvegun eru einfaldlega hlutir sem er ekki hægt að leyfa sér á móti jafn sterku liði og Val. Annars var vörnin góð næstum allan leikinn og gott flæði var í sókninni á köflum. Liðið er að slípast saman og hefur vaxið mikið síðan í fyrsta leik.
Fyrsti leikurinn var fyrir viku þegar Ármenningar fóru á Selfoss að mæta FSu. Jafnræði var með liðunum fram í þriðja leikhluta en þá sigu kjúklingarnir í FSu fram úr með ótrúlegri hittni utan af velli. Leikurinn tapaðist með 27 stigum eftir vægast sagt slakan síðari hálfleik.
Á föstudaginn tók Ármann á móti KFÍ í Höllinni. KFÍ var spáð þriðja sæti deildarinnar enda með sterkan hóp leikmanna. Ármann byrjaði betur en Ísfirðingar voru aldrei langt undan. Jafnræði var með liðunum þar til í þriðja leikhluta þegar KFÍ náði 18 stiga mun eftir vægast sagt andlausan leik Ármenninga sem mættu einfaldlega ekki tilbúnir í síðari hálfleik. Þá kom 8-0 kafli hjá Ármenningum sem reif liðið upp og það saxaði jafnt og þétt á forskot Ísfirðinga. Lokafjórðungurinn var æsispennandi en úrslitum réð vítanýtingin á lokamínútu leiksins. Ísfirðingar fiskuðu afar skringilega óíþróttamannslega villu þegar 3 sekúndur voru eftir og hefðu getað jafnað og fengið boltann aftur. Þeir misnotuðu hins vegar vítin og innkastið rataði ekki á réttan stað. Fyrsti sigur Ármenninga var því í höfn. Karfan.is fjallaði um leikinn.
